༄༅།།རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ངོས་ནས་ལོ་ལྟར་༼དབུ་མའི་ལམ་གྱི་ཐོག་བོད་རིགས་གཞོན་སྐྱེས་བསམ་བློ་བའི་ཚོགས་འདུ༽ཞེས། ཚོགས་སྡེ་འདྲ་མིན་དང་མཐོ་སློབ་ཁག་ནས་ན་གཞོན་བསྡུ་བསྐོང་གིས་ཚོགས་འདུ་འཚོགས་བཞིན་པ་ལྟར་འདི་ལོར་སྤྱི་ཟླ་ ༩ ཚེས་ ༡༨ དང་ ༡༩ ཉིན་གཉིས་རིང་རྡ་སྟེང་བོད་ཁྱིམ་ཞི་བདེ་གླེང་མོལ་ཁང་དུ་ཚོགས་གཏན་འཁེལ་ཡོད་པ་བཞིན། ཐེངས་འདིའི་ཚོགས་འདུའི་སྐུ་མགྲོན་དུ་བོད་མིའི་སྒྲིག་འཛུགས་ཀྱི་བདེ་སྲུང་བཀའ་བློན་རྒྱ་རི་སྒྲོལ་མ་མཆོག་དང་། བོད་ཁྱིམ་སློབ་གྲྭའི་སྤྱི་ཁྱབ་དབུ་འཛིན་རྒན་བསོད་ནམས་སྲི་གཅོད་མཆོག་རྣམ་གཉིས་དང་། ཚོགས་འདུ་དངོས་གཞིའི་སྐབས་ན་གཞོན་རྣམས་ལ་བཀའ་སློབ་གསུང་བཤད་གནང་མཁན་གྱི་མཁྱེན་དཔྱོངས་ཡངས་པའི་མི་སྣ་བཞི་ནི། དང་པོ། དགའ་ལྡན་ཕོ་བྲང་གི་དྲུང་ཆེ་ཡང་སྟེང་རིན་པོ་ཆེ་བློ་བཟང་བསྟན་པའི་རྒྱལ་མཚན་མཆོག གཉིས་པ། བོད་ཀྱི་སྲིད་བྱུས་ཉམས་ཞིབ་ཁང་གི་འགན་འཛིན། སྐུ་ངོ་ཟླ་བ་ཚེ་རིང་མཆོག གསུམ་པ། བོད་མིའི་སྒྲིག་འཛུགས་ཀྱི་མགྲིན་ཚབ་པ་དང་ཕྱི་དྲིལ་ལས་ཁུངས་ཀྱི་དྲུང་འཕར་། སྐུ་ངོ་བསྟན་འཛིན་ལེགས་བཤད་མཆོག བཞི་པ། ཉམས་ཞིབ་པ་ཤེས་རབ་དར་རྒྱས་མཆོག་བཅས་སུ་གཏན་འཁེལ་བྱུང་བའི་གསལ་བསྒྲགས་སུ།

༄༅། །མཚུངས་མེད་རྒྱ་བལ་འབྲུག་གསུམ་གྱི་གཙོས་ཕྱི་རྒྱལ་ཡུལ་གྲུ་ཁག་གི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ས་གནས་རྒྱུན་ལས་ལྷན་རྒྱས་དང་། འབྲེལ་མཐུད་པ་རྣམ་པ། མཐོ་རིམ་སློབ་གཉེར་བ། སེར་སྐྱ་མི་མང་ལྷན་རྒྱས་ཀྱི་སྙན་ལམ་དུ། ཞུ་གསོལ། དེ་ནས་དགོངས་པར་མངའ་གསལ་ལྟར་རྒྱ་ནག་ནས་མཆེད་པའི་ཏོག་དབྱིབས་གཉན་རིམས་བཅུ་དགུ་ (Covid19) འཛམ་གླིང་ཁྱོན་ཡོངས་ལ་ཁྱབ་གདལ་གྱིས་འགྲོ་བ་མི་སྤྱི་ཡོངས་ལ་གསབ་ཏུ་མེད་པའི་གོད་ཆགས་ཀྱིས། ལས་དོན་སྤྱིར་ཕྱིར་བཤོལ་དང་དུས་འགྱངས་སོགས་ངང་གིས་བྱུང་དང་འབྱུང་བཞིན་པ་ལྟར། རྒྱལ་སྤྱིའི་དབུ་མའི་ལམ་མི་མང་ཚོགས་ཆེན་ཐེངས་དང་པོའི་སྐབས་ཀྱི་གྲོས་ཆོད་གཞིར་བཟུང་སྐབས་འདིའི་རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་གི་ཚོགས་ཆེན་ཡང་སྔ་ལོའི་ནང་འཚོག་དགོས་ངེས་ཀྱང་། གནས་སྟངས་དེ་ལྟའི་དབང་གིས་འདི་ལོའི་ནང་མ་གཏོགས་འཚོག་སྐོང་ཐུབ་ཐབས་མ་བྱུང་གཤིས། འདི་ལོའི་ཕྱི་ཟླ་ ༤ ཚེས་ ༣ དང་། ༤། ༥ ཉིན་གསུམ་རིང་། བོད་ཀྱི་ཟློས་གར་དུ་འཚོག་གཏན་འཁེལ་སོང་ན། ས་གནས་ཁག་ནས་ཚོགས་གཙོ་བགྲེས་གཞོན་རྒྱུན་ལས་ཉུང་མཐར་གསུམ་རེས་ལས་བསྡོམས་མཉམ་ཕེབས་དང་། འབྲེལ་མཐུད་པ་རྣམ་པ་དུས་ཐོག་ཆུ་ཚོད་ ༧༢ ནང་ཚུན་ཏོག་ནད་བརྟག་དཔྱད་གྱིས་བདེ་ཐང་ཡིན་པའི་ཕྱག་འཁྱེར་དང་མཉམ་ལྷན་འཛོམས་གནང་རེ་དང་། དེ་མིན་མཐོ་རིམ་སློབ་གཉེར་བ་དང་དོན་གཉེར་ཅན་གྱི་སེར་སྐྱ་མི་མང་ཚོགས་ཆེན་གྱི་ཉིན་བཅོ་ལྔའི་སྔ་རོལ་དུ་ཐོ་འགོད་སླེབས་སྔ་འབྱོར་ལ་གཞིགས་ཏེ་མཚན་ཐོ་ལེན་རྒྱུ་ཡིན་ན། དེ་དོན་དགོངས་འཇགས་ཞུ།། ཕྱི་ལོ་ ༢༠༢༢ ཕྱི་ཟླ་ ༢ ཚེས་ ༡༦ ལ། རྒྱལ་སྤྱིའི་དབུ་མའི་ལམ་མི་མང་ལས་འགུལ་ཁང་ནས།